” ITUNZENI MIUNDOMBINU YA ANWANI ZA MAKAZI”: WAZIRI MKUU KASSIM MAJALIWA 

Imewekwa tar.: February 11th, 2025

Waziri Mkuu wa Jamhuri ya Muungano wa Tanzania, Mhe. Kassim Majaliwa (Mb) amewata watanzania kuilinda miundombinu ya anwani za makazi ambayo serikali imetumia gharama kubwa kuiweka kwenye mitaa na barabara.

Ameyasema hayo wakati wa kilele cha maadhimisho ya wiki ya anwani za makazi yaliyofanyika katika Ukumbi wa Mikutano wa Jakaya Kikwete  jijini Dodoma.

“Tunazo taarifa kwamba anwani za makazi tulizoziandika kwenye nyumba zetu, vibao tulivyoviweka kuonesha mitaa na barabara, kuna baadhi ya watu ambao sio waaminifu wanang'oa na kwenda kuuza, ni muhimu sana tukashirikiana kulinda miundombinu hii kwa usalama wetu lakini kwa uhakika wa mahitaji yako, hasa tunapoingia kwenye ulimwengu wa kidigitali”, alisema.

Pia Waziri Mkuu amewaagiza TANROADS, TARURA, ZANROADS pamoja na Halmashauri zote nchini kuhakikisha wanaweka mundombinu ya anwani za makazi kwenye mitaa na barabara ambazo wanadhamana ya kuzihudumia pamoja na kuilinda miundombinu hiyo.