Huduma za Afyamsingi zimeimarika nchini - Dkt. Biteko

Imewekwa tar.: March 25th, 2024

Na. Fred Kibano, Dodoma 

Naibu Waziri Mkuu wa Tanzania na Waziri wa Nishati Mheshimiwa Dkt. Doto Mashaka Biteko amesema Serikali itaendelea kuboresha huduma za afyamsingi nchini ili kuhakikisha hakuna mwananchi anayekosa matibabu hali tukielekea kwenye huduma ya afya kwa wote.

Dkt. Doto Biteko ametoa kauli hiyo Jijini Dodoma leo tarehe 25 Machi, 2024 wakati akitoa hotuba kwa niaba ya Mhe. Dkt Samia Suluhu Hassan, Rais wa Jamhuri ya Muungano wa Tanzania na kusema katika kipindi cha Serikali ya Awamu ya Sita sekta hiyo muhimu ilitengewa kiasi kikubwa cha fedha kwa ajili ya kujenga na kukarabati miundombinu, kununua vifaa tiba, dawa, magari ya wagonjwa na kuajiri watumishi. 

“idadi ya vituo vya afya imeongezeka kutoka mwaka 2017 hadi 2024 jumla ya vituo vya afya 2799 vimejengwa, zahanati zimeongezeka hadi kufikia 1762, vituo vya afya 910 na hospitali 127, majengo ya kutolea huduma za dharura 83, na majengo ya wagonjwa mahututi 28, nyumba za watumishi 150, gharama za ujenzi na ukarabati zimefikia shilingi Bilioni 937.2 hii ni hatua muhimu ya kutaka kuimarisha huduma ya afya ya msingi” alisema Dkt. Doto Biteko.

Kuhusu vifaa tiba amesema shilingi Bilioni 364.7 zilitolewa kununua x-ray 289 na utra sound 190, wakati magari 328 ya shilingi Bilioni 52 kwa ajili ya usimamizi shirikishi na wagonjwa wa dharura yalinunuliwa pamoja na utoaji wa vibali vya kuajiri watumishi wa kada ya afya zaidi ya 18,000. 

Aidha, amewataka viongozi nchini kuwatia moyo na kutambua mchango wa madaktari bila kuchukua madhaifu ya wataalam wachache ambao sio waaminifu wanaotia doa sekta hiyo na badala yake wachache wanaokiuka maadili wachukuliwe hatua za kisheria.

Katika hatua nyingine Dkt. Biteko amewaagiza viongozi na watendaji kuhakikisha kuwa miundombinu ya afya inatunza, kutoa elimu ya afya na chanjo kwa jamii, kutafuta mbinu za kuajiri watumishi katika kada ya afya na kuweka mifumo thabiti mipango ya tathmini na ufuatiliaji ili kutambua maeneo ya kufanyia maboresho kwenye sekta ya afya.

Naibu Waziri Ofisi ya Rais TAMISEMI (AFYA) Mhe. Dkt. Festo Dugange amesema lengo la mkutano huo wa kimataifa ni kuweza kujadiliana, kubadilishana uzoefu, mbinu na namna ya kuboresha huduma za afyamsingi kwa lengo la kuelekea hudma ya afyamsingi kwa wote.

Naibu Waziri wa Afya Dkt. Godwin Moleli amesema katika kipindi cha miaka mitatu ya uongozi wa Mheshimiwa Dkt. Samia Suluhu Hassan, Rais wa Jamhuri ya muungano wa Tanzania alitoa jumla ya shilingi Trilioni 6.7 kwa ajili ya kuboresha Sekta ya Afya ikiwemo afya ya msingi na huduma ya mama pia amewaomba watendaji wa Sekta ya Afya kwenda kuboresha usimamizi kwenye maeneo yao ili kufanya vizuri zaidi. 

Naye Mwakilishi Mkazi wa UNICEF Tanzania Bi. Elke Wisch ameipongeza Tanzania kupitia Wizara ya Afya na ofisi ya Rais TAMISEMI kwa kuendelea kuboresha huduma za afyamsingi ili kuhakikisha hakuna mtoto anayeachwa nyuma, kupunguza vifo vya watoto pamoja na kuongeza na kuboresha huduma za afya kutoka kipindi cha mwaka 2010 hadi 2022.