Halmashauri zaagizwa kujenga madarasa kukabili wingi wa wanafunzi

Imewekwa tar.: May 10th, 2021

Na Mathew Kwembe, Sengerema

Serikali imezitaka  Halmashauri zote nchini kuhakikisha  kuwa zinajenga madarasa ya kutosha ya shule za msingi na sekondari ili kukidhi ongezeko kubwa la watoto wanaojiunga na elimu hiyo kufuatia hamasa iliyotokana na sera ya elimu bila ada.

Akizungumza jana Wilayani Sengerema wakati akikagua shule tatu kati ya 15 mpya zinazojengwa na wananchi, Naibu Waziri Ofisi ya Rais Tawala za Mikoa na Serikali za Mitaa, Mhe.David Silinde amesema ni wajibu wa halmashauri zote nchini kuhakikisha kuwa zinashirikiana na wananchi kujenga shule hizo kwa kutenga fedha kutoka mapato yake ya ndani.

Amesema jukumu la Serikali kuu ni kupeleka fedha kwa ajili ya ujenzi wa mabweni kwa shule zinazochukua wanafunzi wa kidato cha tano na sita.

Naibu Waziri amesema kuwa Ofisi ya Rais TAMISEMI ilikwishatoa maelekezo kwa halmashauri kuhakikisha kuwa zinatenga fedha kila mwaka katika mapato yao ya ndani kulingana na kiwango cha fedha kinachopatikana.

“Kwa mfano zile halmashauri zenye mapato ya chini ya shilingi bilioni moja na nusu zinapaswa kujenga madarasa 20 kwa mwaka, na halmashauri zinazoanzia mapato ya bilioni moja na nusu hadi bilioni tano zijenge madarasa 40 kwa mwaka, na zile halmashauri zenye mapato ya zaidi ya shilingi bilioni tano zijenge madasa 80 hadi 120 kwa mwaka,” ameeleza Mhe Silinde.

Naibu Waziri amefafanua kuwa hatua hii ya serikali inalenga kuondoa janga la wanafunzi kukaa chini, na kusomea chini ya miti kwa kuzingatia kuwa sasa hivi kuna idadi kubwa ya wanafunzi wanaofanyiwa udahili wa kujiunga na shule hizo.

“Tangu serikali ya hayati Dkt John Pombe Joseph Magufuli ilipoleta sera yake mpya ya elimu bila ada na kuongeza udahili mwingi kwa wanafunzi sasa hivi kwa mfano watoto waliopo darasa la sita leo nchi nzima takwimu tulizo nazo wako watoto 1,800, 000,” ameeleza na kuongeza:

“Sasa wastani wa watoto kufaulu nchi hii ni zaidi ya asilimia 80, kwa hiyo uki –calculate hiyo asilimia 80 unazungumzia karibu watoto watoto 1,400,000 hadi 1,500,000 watafaulu na itabidi warudi sekondari.”

Ameongeza kuwa uwezo wa sekondari zote nchini kubeba wanafunzi wa kidato cha kwanza ni kubeba wanafunzi 780,000 tu hivyo wanafunzi hawa watakapojiunga na kidato cha kwanza mwaka 2023, wanafunzi 700,000 watakosa madarasa.

“ Kwa hiyo ndiyo maana tumekuja na hayo maelekezo kuwa halmashauri ni lazima zijenge madarasa, na sisi serikali tumetafuta fedha kujenga shule 1000 ambazo zikikamilika tutakuwa na uwezo wa kuokoa wanafunzi 400,000,” amesema.

Amesema hata baada ya shule hizo 1000 kujengwa bado watoto 300,000 watakosa nafasi katika madarasa hayo, hivyo ni wajibu wa kila halmashauri kuhakikisha kuwa wanashirikiana na wananchi kujenga madarasa ya kutosha katika halmashauri zao.

Akizungumzia ujenzi wa shule 15 mpya za sekondari wilayani Sengerema, Mhe Silinde amempongeza Mbunge wa jimbo hilo Mhe.Hamis Tabasam kwa kuwahamasisha wananchi kutoka kata 15 za wilaya hiyo kujenga madarasa kwa ajili ya watoto wao.

Mhe.Silinde ameahidi kwamba mara tu ujenzi wa shule hizo 15 utakapokamilika atazipatia mabweni shule tano mpya zitakazochaguliwa na halmashauri ya wilaya  ya Sengerema kupokea wanafunzi wa kidato cha tano.

Katika ziara yake wilayani Sengerema, mbali na kutembelea miradi ya masoko,  na stendi,  Naibu Waziri ametembelea shule tatu na kuweka jiwe la msingi katika shule mpya za sekondari za kata za Nyambulukano, Ibondo na Ngoma.