Halmashauri ya Chamwino waaswa kuongeza weledi katika ukusanyaji wa mapato

Imewekwa tar.: December 7th, 2022

Na. Fred Kibano – Chamwino, Dodoma 

Naibu Waziri, Ofisi ya Rais, Tawala za Mikoa na Serikali za Mitaa (TAMISEMI) Mhe. Dkt. Festo Dugange amemtaka Mkurugenzi na Mweka Hazina wa Halmashauri ya Chamwino kufuatilia kwa karibu makusanyo ya mapato katika Halmashauri hiyo.

Dkt. Dugange ameyasema hayo Desemba 6, 2022 katika Halmashauri ya Chamwino mkoani Dodoma alipofanya ziara kukagua miradi ya maendeleo iliyotokana na fedha za Tozo za miamala ya simu.

“fedha nyingi zinazokusanywa kupitia mashine za kieletroniki za kukusanyia mapato (POS) hazipelekwi kwenye akaunti kwa wakati na muda mwingine hazipelekwi kabisa kwenye akaunti zaohusika lakini pia kuna POS (mashine) ambazo zinazimwa kwenye vijiji kwa zaidi ya siku 500, siku 600, siku 700 bila kuwa na taarifa zozote” alisema Dkt. Dugange.

Aidha, Dkt. Dugange amemtaka Mweka Hazina wa Halmashauri hiyo na Mkurugenzi kuhakikisha mashine za kieletroniki za kukusanyia mapato (POS) kama zinafanya kazi au zimezimwa ili kuzibaini mapema na kuchukua hatua stahiki ikiwa ni pamoja na kuhakiki kama zimeharibika zirudishwe kwa ajili matengenezo.

Mkurugenzi wa Halmashauri ya Wilaya ya Chamwino Dkt. Semistatus Mashimba amesema Halmashauri yake imekusanya mapato ya ndani shilingi milioni 700 mpaka sasa lakini lengo lao ni kukusanya shilingi Bilioni 3.