BILONI 1.5 ZIMEPELEKWA MBINGA, UJENZI WA HOSPITALI YA WILAYA -DKT. DUGANGE

Imewekwa tar.: January 7th, 2023

OR - TAMISEMI

Naibu Waziri Ofisi ya Rais – TAMISEMI, Dkt. Festo Dugange amesema Serikali tayari imepeleka bilioni 1.5 kujenga Majengo saba ya awamu ya kwanza ya hospitali ya halmashauri ya Wilaya Mbinga Mkoani Ruvuma ambapo ujenzi unaendelea na upo katika hatua za ukamilishaji.

Dkt. Dugange ameeleza hayo Leo tarehe 7 januari 2023 katika ziara ya Waziri Mkuu, Mhe. Kassim Majaliwa kwenye Halmashauri ya wilaya Mbinga mkoani Ruvuma wakati wakizungumza na Wananchi baada ya kutembelea eneo la uchimbachi wa makaa ya mawe Ruanda.

“Halmashauri ya Mbinga haikuwa na Hospitali ya wilaya, wananchi walilazimika kufuata huduma Halmashauri ya Mbinga Mji au Songea, Serikali inayoongozwa na Mheshimiwa Rais Dkt. Samia Suluhu Hassan mwaka ilileta bilioni moja na milioni mia tano kujenga majengo saba ya awamu ya kwanza” amesema Dkt. Dugage

Amesema majengo ya Hospitali hiyo yakikamilika, Serikali italeta Vifaa tiba vya thamani ya shilingi milioni 500 ili kuwawezesha wananchi wa Halmashauri hiyo kupata huduma bora za Afya pamoja na  huduma ya upasuaji wa dharura  kwa wakinamama wajawazito.

Aidha, Dkt. Dugange ameeleza kuwa vituo vya afya vitatu vinaendelea kujengwa kwa gharama ya bilioni 1.5 na zahanati 4 mpya nazo zinaendelea kujengwa katika wilaya ya Mbinga.

Katika Sekta ya Elimu, Dkt. Dugange amesema mwaka jana Serikali  imejenga madarasa 88 kwa ajili ya kupokea wanafunzi wa kidato cha kwanza yaliyogharimu shilingi bilioni moja na milioni mia saba sitini.

Dkt. Dugange amesema katika mwaka wa fedha wa 2022/23, Mheshimiwa Rais Dkt. Samia ameleta milioni 200 kujenga madarasa mapya ambayo tayari yamekamilika na yatapokea wanafunzi wanaonza Elimu ya Sekondari wiki ijayo katika wilaya ya Mbinga.

Katika Sekta ya barabara, Dkt. Dugange amesema Wizara imeshawaelekeza Mameneja wa TARURA wa wilaya na mikoa kutambua barabara zote muhimu na kuzifanyia matengenezo mara kwa mara ikiwani ni pamoja na ujenzi wa madaraja na karavati.

5:23 PM 1/9/2023