ALAT yaunga Mkono Agizo la JPM, Yajenga Ofisi Dodoma

Imewekwa tar.: February 11th, 2019

Jumuiya ya Serikali za Mitaa Tanzania (ALAT) imeunga mkono agizo la Rais wa Jamhuri ya Muungano wa Tanzania Mhe.Dkt John Joseph Magufuli lililotaka Taasisi zote kuhamia Makao Makuu ya Nchi kwa kuanza ujenzi wa Jengo la Kitega uchumi katika kiwanja chao kilichopo eneo la Tambukareli barabara ya chuo kikuu cha Dodoma Jijini hapa.

Akizungumza katika ziara ya kutembelea Jengo dogo linaloendelea kujengwa hivi sasa  Mwenyekiti wa ALAT Taifa Mhe.Gullam Hafeez Mukadam amesema wameanza na kujenga jengo dogo kwa ajili ya Ofisi ambalo litakamilika mwishoni mwa mwezi huu.

“Kama mnavyoona hapa ujenzi unaendelea na tumeamua kuanza kwa kujenga jengo dogo la Utawala ambalo litatumiwa na watumishi na viongozi wote wa ALAT na eneo linalobakia ndio ambalo litajengwa Jengo la Kitegauchumi” alisema Mhe. Mukadam.

Aliongeza kuwa kiwanja hiki kina ukubwa wa zaidi  Square meter  6000 na hili jengo linalojengwa sasa linatumia takribani Sqm 1000 tu hivyo eneo lililobakia ni kubwa na litatosha kwa ajili ya mradi wetu wa kitega uchumi tunaoutarajia.

Alizitaka Halmashauri zote Nchini kuendelea kulipa ada za uanachama kwani ndio mapato ya Jumuiya hiyo yatakayosaidia katika ujenzi wa Kitega uchumi hicho na shughuli zingine za maendeleo.

Aidha Mhe. Mukadam alimshkuru Rais John Magufuli kwa ahadi yake ya kuunga mkono mradi wa ujenzi wa jengo hilo la kitega uchumi.

Akizungumza katika ziara hiyo Katibu Mkuu wa ALAT Abdalah S. Ngodu amesema kuwa jengo dogo la Ofisi linaloendelea kujengwa hivi sasa litagharimu jumla ya shilingi Mil. 156 na litakamilika mwishoni mwa mwezi huu.

“Sisi kama jumuiya ya Serikali za Mitaakatika ujenzi wa jengo hili hatuna mkandarasi  tunatumia mafundi wa jamii  ‘Force Account’ kama ilivyothibitika katika ameneo mengi kuwa ujenzi huu hutumia gharama kidogo huku ubora ukizingatiwa” Alisema Ngodu.

Naye Mhandisi anayesimamia jengo hilo ambaye ni mtumishi wa Jiji la Dodoma Nicodemus Kileo amesema mpaka sasa ujenzi unaendelea vizuri na hakuna changamoto kubwa zilizojitokeza hivyo wanatarajia kukamilisha ujenzi huo kwa muda uliopangwa.