Waziri Mkuu atoa maagizo kwa Wakuu wa Mikoa Nchini

Imewekwa tar.: November 21st, 2020

WAZIRI MKUU wa Jamhuri ya Muungano wa Tanzania Mhe. Kassim Majaliwa (Mb) amewaagiza Wakuu wa Mikoa yote nchini  kufanya  ukaguzi kwenye viwanda vya kuzalisha saruji, mawakala, wauzaji wa kati na wadogo wa bidhaa hiyo na wachukue hatua stahiki.  

Ametoa agizo hilo leo jioni (Jumamosi, Novemba 21, 2020) wakati akizungumza na Wakuu wa Mikoa yote nchini kuhusu tatizo la kupanda kwa bei ya saruji nchini kwenye kikao alichokiendesha kwa njia ya video (video conferencing) kutokea ofisini kwake Mlimwa, Dodoma.  

“Wakuu wa Mikoa na Kamati zenu za Ulinzi na Usalama fanyeni ukaguzi kwa mawakala, ukikuta wamerundika saruji kamata na kuwashtaki. nendeni pia kwa wauzaji wa kati, nao pia chekini maghala yao,” Amesisitiza Mhe Majaliwa.

Adha, amewataka kupitia kwa maafisa biashara na kuwasimamia iwe ni kwenye Sekretarieti za Mikoa au katika Halmashauri zao, na kuwataka kurudisha bei ilivyokuwa mwezi Septemba kwa sababu hakuna badiliko lolote kwenye tozo ya kodi.