Waziri Jafo: Tutaendelea kufanyakazi kwa kasi

Imewekwa tar.: December 10th, 2020

Na. Angela Msimbira DODOMA

Waziri wa Nchi Ofisi ya Rais Tawala za Mikoa na Serikali za Mitaa Mhe Selemani Jafo amesema kwa sasa TAMISEMI  itafanyakazi  kwa kasi   ya  kushambulia na kufuatilia ili kufukia mapungufu yaliyopo  katika utendaji kazi.

Akiongea na Menejimenti ya Ofisi hiyo leo  Jafo amewataka watumishi wote wa Mamlaka za Serikali za Mitaa kuhakikisha wanafanyakazi kwa weledi hasa katika kutoa huduma kwa jamii ili kupunguza kero mbalimbali zinazotolewa na wananchi

Amewataka watumishi wote kujenga mahusinao mazuri katika kazi ili kuleta mabadiliko kwa jamii na kufikia malengo ya Serikali katika kutoa huduma bora kwa wananchi.

Akiongelea kuhusu  Sekta ya Elimu  Waziri Jafo amemuagiza katibu Mkuu Ofisi ya Rais- TAMISEMI Mhandisi Joseph Nyamhanga kuandaa taarifa itakayoonyesha  matumizi  ya fedha  zilitolewa  mnamo tarehe  26/6/2020  kwa ajili ya ujenzi wa Mabweni, Madarasa ili kujua maeneo yaliyokamilisha ujenzi huo na wale  ambao hawajakamilisha, na nini  mikakati ya kukamilisha.

Amewataka watendaji wote nchini kuhakikisha wanasimamia miradi ya maendeleo ikiwemo fedha zilizotolewa kwa ajili ya ujenzi wa miundombinu ya elimu  ili fedha zitakazotumika ziendane na majengo yanayonjengwa

Hata hivyo, amemuagiza Katibu Mkuu huyo kuhakikisha  wanapata taarifa  ya mikakati ya Mikoa kuhusu ujenzi wa madarasa ili kuhakikisha watoto wote waliofaulu mitihani ya kumaliza elimu ya msingi wanapata nafasi  ya kuendelea na masomo

Waziri Jafo amewataka viongozi wa Sekta ya Afya na TARURA kuhakikisha wanapanga mikakati madhuburi ya kuainisha vipaombele vya Serikali katika utoaji wa huduma kwa wananchi.

Amewataka TARURA kuhakikisha  wanasimamia kwa karibu  miradi inayotekelezwa na kuacha  kuwatumia  wakandarasi wanaojifanya  kujulikana  na  wanamiradi mingi ya kufanya na kuwataka kuhakikisha  miradi yote iliyopo  chini ya TAMISEMI  inakamilika kwa wakati uliopangwa

Naye Naibu Waziri Ofisi ya Rais Tawala za Mikoa na Serikali za Mitaa anayeshughulikia Afya   Mhe Festo Dugange  amesema pamoja na ruzuku za Serikali tutaendelea kusimamia ukusanyaji wa mapato kwenye vituo vya kutolea huduma, ili  kuhakikisha fedha zinazokusanywa katika vituo vya kutolea huduma za afya zinapelekwa katika  kuboresha huduma za afya, upatikanaji wa dawa na vitendanishi matengenezo madogomadogo na hatimaye kuendelea kwa hatua kupunguza utegemezi  kwa bajeti ya Serikali

Wakati huohuo, Naibu Waziri Ofisi ya Rais Tawala za Mikoa na Serikali za Mitaa anayeshughulikia Elimu Mhe. David Silinde amesema kuwa wamekuja kuongeza ufanisi wa utendajikazi, kuhakikisha kuwa huduma inawafikia wananchi moja kwa moja.

Aidha amewataka watumishi wa Mamlaka za Serikali za Mitaa kuacha kufanyakazi kwa mazoea bali watumie mazoea na uzoefu walionao ili kufikia malengo ya kutoa huduma bora kwa wananchi’