Wananchi watakiwa kushiriki usimamizi huduma za afya.

Imewekwa tar.: April 5th, 2019

Naibu Katibu Mkuu Afya Ofisi ya Rais Tawala za Mikoa na Serikali za Mitaa Dkt Dorothy Gwajima ametoa wito kwa Wananchi kuimarisha ushiriki wao kwenye Kamati za Usimamizi wa Huduma za Afya katika Vituo vya Kutolea huduma za Afya.

Akihojiwa hivi karibuni kuhusu maboresho ya huduma za afya nchini Dkt. Gwajima amesema, pamoja na kukamilika kwa vituo 352 vilivyozinduliwa  na  Rais wa Jamhuri ya Muungano wa Tanzania Mhe. Jon Pombe Magufuli  Serikali inaendelea kuboresha miundombinu ya afya ambapo kufikia Juni, 2019 awamu ya kwanza ya ujenzi wa Hospitali 67 za Halmashauri utakuwa umekamilika kupitia mpango wa ushirikishwaji wa Wadau, Wananchi na Serikali kwa ujumla.

Dkt. Gwajima amesema, ushiriki wa Wananchi katika Kamati hizi ni muhimu ili, kuwezesha kuwa na sauti katika mipango ya maendeleo ya vituo husika na utawezesha mipango ya maendeleo ya huduma za afya katika vituo husika kugusa kwa karibu zaidi matarajio yao.

Amesema sambamba na kuboresha miundombinu na kuongeza idadi ya vituo, Ofisi ya Rais Tawala za Mikoa na Serikali za Mitaa itahakikisha huduma bora zinapatikana muda wote na kufikia matarajio ya watumiaji.

Dkt. Gwajima anafafanua kuwa, azma ya Serikali ni kuhakikisha huduma bora za afya zinapatikana ngazi ya afya ya msingi na kuwapunguzia mzigo wa gharama za muda na fedha Wananchi wenye uhitaji.

“ Upatikanaji wa huduma bora karibu zaidi na Wananchi utawapunguzia gharama za kwenda mbali na makazi yao kufuata huduma ambazo, zinaweza kupatikana katika Zahanati, Vituo vya Afya na Hospitali za Halmashauri” Anasisitiza Dkt. Gwajima.

Ametoa wito kwa Wananchi kuhakikisha wanawakilishwa vema katika Kamati za Usimamizi wa Huduma za Afya katika Vituo husika kuanzia ngazi ya Zahanati, Vituo vya Afya na Hospitali za Halmashauri

 “Kamati za Usimamizi Huduma za Afya zenye uwakilishi wa Wananchi zishirikiane  na Wataalamu wanaotoa huduma katika vituo husika ili, ushirikiano uendelee katika maendeleo ya huduma za afya na kuwafanya Wananchi kuwa na sauti katika maendeleo husika” Amesema Dkt. Gwajima

Ameongeza kuwa, ni wajibu wa Wenyeviti wa Kamati za Usimamizi wa Huduma za Afya kuwa daraja kati ya kituo husika na Wananchi ili, kuendeleza kuimarisha umoja na ushirikiano katika kuleta maendeleo ya huduma za afya nchini.

Hata hivyo Dkt.Gwajima amewakumbusha watoa huduma za afya nchini  kuwa, mteja ni mfalme hivyo siku zote utoaji wa huduma uzingatie huduma bora kwa mteja ili, Wananchi waendelee kuhamasika kuchangia katika maendeleo ya sekta ya afya.

Dkt Gwajima amesema, pamoja na uwepo wa vituo hivi, Serikali itaendelea kuratibu huduma za tiba kwa mkoba kwa kutumia Wataalamu toka hospitali za kibingwa ili, kuwafikia Wananchi karibu na makazi yao.

Aidha, Dkt Gwajima ametoa Shukrani kwa Wadau wote, Wananchi na Viongozi wote waliosimamia utekelezaji wa mpango wa ujenzi wa vituo 352 vya kutolea huduma za afya na kuwaomba kuendelea na ushirikiano na mshikamano huu daima.

Na. Angela Msimbira - Masasi Mtwara