Uwekezaji kwenye Elimu waanza kuzaa matunda

Imewekwa tar.: July 12th, 2019

WAZIRI wa Nchi, Ofisi ya Rais, Tawala za Mikoa na Serikali za Mitaa(TAMISEMI), Selemani Jafo ametoa siri ya shule za serikali kufanya vizuri kwenye matokeo ya kidato cha sita mwaka 2019, akidai kuwa ni kutokana na uwekezaji uliofanywa kwenye sekta ya elimu.

Akizungumza na jana na waandishi wa habari ofisini kwake jijini hapa, Jafo alisema shule hizo zimefanya vizuri ikilinganishwa na awali ambapo ufaulu wake haukuwa mzuri.

“Hapo awali ulikuwa ukiangalia shule 100 bora, shule za serikali zilikuwa za kutafuta…Siri kubwa ya mafanikio ya shule za serikali kufanya mapinduzi makubwa ni uwekezaji katika elimu,”alisema.

Alisema serikali imewekeza katika miundombinu ya elimu ambayo kwasasa ni rafiki, uwepo wa vifaa vya maabara na mabilioni mengine ya fedha yameingizwa kwenye ununuzi wa vifaa hivyo.

“Tumewekeza pia katika rasilimali watu, tumeongeza idadi ya walimu leo hii, shule zina walimu 40-30 wakati zamani zilikuwa zina walimu 5-7, kuna shule hadi walimu wengine wanabadilishana vipindi, tulikuwa na changamoto ya walimu wa sayansi ambayo tunaendelea kuwekeza huko na wanafunzi wameanza kufanya vizuri,”alisema.

Waziri Jafo alisema shule za kata hali yake ya awali haiwezi kulingana na sasa ambapo kuna walimu wa kutosha huku akiwataka wazazi kuwaacha watoto kusoma kwenye shule wanazochaguliwa.

“Usione mtoto amepelekwa shule ya kata ukadharau, kumbuka shule hii inaweza kupiga bao leo hii tuangalie shule ya Lukole matokeo yake linganisha na Jangwani au Azania, tusihamishe watoto tuwaache wasome, serikali imeweka uwekezaji mkubwa, niwatoe hofu watanzania tunaenda sasa sehemu nzuri na salama,”alisema.

Alifafanua kuwa ufaulu umeendelea kuimarika ambapo umepanda kutoka asilimia 98.2 hadi 98.93 na kwamba katika shule 10 bora za kwanza shule nne ni za serikali.

“Hii ni faraja kubwa sana kwa mwaka wa pili mfululizo tumeona Kibaha ambayo mwaka jana ilikuwa ya kwanza, shule nyingine Kisimiri ambayo ni shule ya kata kihistoria sasa imekuwa ya kwanza,”alisema.

Waziri huyo alitaja shule hizo nne zilizoingia 10 bora kuwa ni Kisimiri, Mwandeti, Tabora boys na Kibaha.

“Kwa hiyo haya ni mafanikio makubwa ambayo tumedhamiria kuyafanya, tumeona shule hizi mbili zina asili ya kata, niwapongeze walimu na wanafunzi kwa kuweza kufanya vizuri,”alisema.

Aidha alisema nafasi ya 11 hadi 20, shule sita za serikali ambazo ni Ilboru, Nachingwea, Mzumbe, Mwanamwema, Tabora girls na Dareda.

“Shule hizi zinafanya vizuri ikilinganishwa na kule tulikotoka mwanzo, pia katika shule 100 bora mwaka huu shule 64 ni za serikali ambazo 52 ni za kata na 12 ni shule kongwe na vipaji maalum,”alisema.

Alisisitiza kuwa shule za kata kwasasa zinatimua mbio licha ya wengine walikuwa wakizibeza.

“Wazazi acheni watoto wasome kwenye hizo shule serikali imeweka mazingira rafiki kupeleka vifaa na walimu na haya ndo matunda makubwa ya serikali,”alisema.

Kadhalika, alisema katika wanafunzi 10 bora watano wametoka shule za serikali na wanafunzi watano bora wa masomo ya sayansi ni shule za serikali.

Alipongeza mikoa mitatu ambayo ni Arusha, Tabora na Pwani ambazo shule za serikali zimefanya vizuri kwa kuingia 10 bora.

“Nimpongeze Mkuu wa mkoa wa Pwani anajitahidi sana kuna shule pale inaitwa Maneromango ndo imetoa kwa mara ya kwanza wanafunzi wa kidato cha sita imefanya vizuri imekuwa shule ya 59 kitaifa kati ya shule 594, na ni shule ya pili kwa mkoa wa Pwani ukiacha Kibaha,”alisema.

Alisema ataandaa vyeti maalum kwa wakuu wa mikoa hiyo mitatu huku akiagiza tathmini ifanyike kwa mikoa iliyofanya vibaya ili kutafutia ufumbuzi changamoto zinazokwamisha ufaulu.

“Ifanyike tathmini mkoa wa Mara takribani shule 3 zipo kwenye kundi la ambazo hazijafanya vizuri, tujue nini kimejitokeza kwenye shule zile ili yale yote madhaifu tuyafanyie kazi wafanye vizuri zaidi, na ifikapo 2020 kutakuwa na mapinduzi makubwa kwenye elimu,”alisema.

Mwisho.