Usimamizi Utaongeza Mapato Soko la Dhahabu Geita – Nyamhanga

Imewekwa tar.: February 10th, 2020

Katibu Mkuu Ofisi ya Rais TAMISEMI Mhandisi Joseph Nyamhanga ameridhishwa na mradi wa soko la dhahabu lililopo Halmashauri ya Mji Geita na kuagiza kuimarisha ukusanyaji wa mapato.

Mhandisi Nyamhanga ametoa kauli hiyo wakati akifanya ziara yake ya kikazi ya kujionea miradi ya maendeleo ambayo imefikia hatua mbalimbali ikiwa ni pamoja na soko la madini katika Halmashauri ya Mji Geita.

“wekeni usimamizi wa karibu katika ushuru wa huduma ili mapato ya Halmashauri yaongezeke na kutumika kwa ajili ya shughuli za maendeleo”

Nyamhanga ameagiza kuchukua hatua kwa baadhi ya kampuni za madini  ambazo zimekuwa zikitoa makadirio ya gharama kubwa za ujenzi kwa miradi wanayoifadhili kama mashule na vituo vya kutolea huduma za afya na kwamba pawepo na utaratibu maalum wa kuweka sawi bei za vifaa mbalimbali vya ujenzi kama vilivyo kwa mujibu wa bei za Serikali  .

Soko la dhahabu la Geita linalojengwa kwa thamani ya shilingi Bilioni 1.7 katika awamu tatu na limefikia asilimia 75 ya ujenzi wote.

Kwa upande wake Katibu Tawala Mkoa wa Geita Bw. Dennis Bandisa amesema wataendelea kuhakikisha thamani halisi ya fedha inapatikana kutokana na mradi huo lakini pia kuhakikisha mchakato maalum unaanzishwa ili makampuni yanayotoa misaada yanafuata bei na taratibu za manunuzi ya Serikali ili kuokoa kiasi cha fedha kinachoweza kupotea.  

Mradi huo unatarajiwa kuongeza mapato ya ndani kwani katika katika kipindi cha mwezi Julai hadi Disemba 2019 jumla ya zaidi ya shilingi milioni 138 zilikusanywa na matarajio ya baadaye ni kukusanya zaidi ya shilingi bilioni moja kila mwaka.

Katika hatua nyingine Mhandisi Nyamhanga amekagua ujenzi wa vyumba vya madarasa kwa kutumia tofali maalum katika shule ya sekondari ya Nyanza Geita Mji na kupongeza hatua iliyofikiwa ikiwa ni pamoja na kuwepo kwa thamani halisi ya fedha.

Mhandisi Nyamhanga yup ziarani mkoani Geita kwa ajili ya kukagua miradi ya maendeleo na kujionea utoaji wa huduma kwa wananchi.

          Anaandika Fred Kibano