Ujenzi Sekondari Mji Mpya Wahamisha, Washusha Cheo Maafisa

Imewekwa tar.: July 9th, 2019

Serikali imesikitishwa na kuzorota kwa ujenzi wa shule ya sekondari Mji Mwema Katika Manispaa ya Morogoro hali ambayo imemlazimu Katibu Mkuu Ofisi ya Rais TAMISEMI Mhandisi Joseph Nyamhanga kuchukua hatua.

Mhandisi Nyamhanga ameagiza kuhamishwa kituo cha kazi Afisa Elimu Sekondari pia kumhamisha nje ya mkoa na kumshusha cheo Afisa Ugavi wote wa Manispaa ya Morogoro.

“nimeagiza mara nyingi sana toka mwezi Aprili ujenzi huu uanze lakini umeanza kwa kuchelewa, kwa nini ujenzi umeanza kwa kuchelewa, kwa nini wanafunzi wote 840 mmekwenda kuwarundika  shule ya sekondari Tushikamane?” Alihoji Mhandisi Nyamhanga.

Aliyehamishwa kituo cha kazi ni Bw. George Oguta Afisa Elimu Sekondari ambaye amehamishiwa Halmashauri ya Kilombero na Peter Lebalwa Afisa Ugavi ambaye amemwagiza Mkurugenzi wa Manispaa ya Morogoro Bw. John Mgarula kumshusha cheo na kumhamisha na pia Katibu Tawala Mkoa Bw. Clifford Tandari kumwamisha nje ya Mkoa kutokana na kushindwa kusimamia ujenzi wa shule ya sekondari Mji Mpya na kusababisha msongamano wa wanafunzi katika shule ya sekondari Tushikamane ambayo ina wanafunzi 640 na kupokea wanafunzi wa Mji Mpya 840.

Aidha, Mhandisi Nyamhanga amemtaka Mkurugenzi wa Manispaa ya Morogoro Bw. John Mgarula kujitathmini kama anatosha kwa kushindwa kuwasimamia watumishi walio chini yake kwani ameshindwa kuanza ujenzi kwa wakati kuepuka msongamano wa wanafunzi uliotokea sasa.

Awali Mkurugenzi huyo akisoma taarifa mbele ya mgeni rasmi, amesema ujenzi huo ambao upo katika hatua ya msingi na zege umefikia asilimia 30 jambo ambalo Mhandisi Nyamhanga hakukubaliana nalo.

Mgarula amesema ujenzi huo utagharimu shilingi Bilioni moja na milioni 450 ambazo zote ni kutoka Serikali Kuu. Pia mkandarasi Corporation Sole Works Superintendent amekwishalipwa asilimia 50 sawa na shilingi milioni 715 na ujenzi huo unatarajiwa kukamilika tarehe 25 Oktoba mwaka huu.

Kwa upande wake Katibu Tawala Mkoa wa Morogoro Bw. Clifford Tandari amesema wameyapokea maagizo ya Serikali na kwamba watafanya kazi ya ujenzi usiku na mchana kwani wamefunga taa za kumulikia ili kukamilisha ujenzi wa shule na wanafunzi wapatao 840 waanze masomo mapema iwezekanavyo.

                  Anaandika Fred Kibano