Taarifa tata ujezi wa stendi, zampeleka Waziri Jafo Singida

Imewekwa tar.: December 17th, 2020

Waziri wa Nchi, Ofisi ya Rais Tawala za Mikoa na Serikali za Mitaa Mhe. Selemani Jafo  amekagua mradi wa Stendi ya Misuna Mkoani Singida ili kujiridhsiha baada ya kupata taarifa za mashaka kuwa mradi huo umetumia zaidi ya Sh bilioni 24.

Akizungumza Mkoani Singida leo mara baada ya kupewa taarifa ya utekelezaji wa mradi huo, Waziri Jafo amesema  alifika kukagua mradi huo baada ya kupewa taarifa kuwa stendi hiyo imejengwa na gharama kubwa.

“Nimekuja hapa kujua gharama za mradi wa stendi zimetumika kiasi gani? Unaweza kushangaa nitoke nilikotoka kuja kujua gharama, lakini niko hapa baada ya kupata taarifa kuwa mradi huu umetumia fedha nyingi zaidi,” amesema Waziri Jafo

Waziri Jafo ameonyesha kuridhishwa mara baada ya kupewa  maelezo  na kukagua mradi huo  na kumuagiza Katibu Mkuu Ofisi ya Rais Tawala za Mikoa na Serikali za Mitaa Mhandisi Nyamhanga kuwatuma wataalam kuhakiki mradi  ili kujiridhisha na gharama halisi za ujenzi wa Stendi hiyo.

“Kwa maelezo yenu na nilivyokagua utekelezaji wa miradi nimeridhishwa, lakini namuagiza Katibu Mkuu TAMISEMI kuwatuma wataalam kukagua kwa kina utekelezaji wa mradi huu,” amesema Waziri Jafo

Hata hivyo, Mkurugenzi wa Manispaa ya Singida, Bw. Bravo  Lyampembile amebainisha kuwa Ofisi yake ilipokea zaidi ya Sh bilioni 24.27 na kati ya hizo Sh bilioni 2.7 zimetumika kujenga stendi kuu ya mabasi na stendi ndogo ya daladala

Akitoa taarifa, Bw.  Lyampembile amesema Halmashauri imejenga stendi yenye ukubwa wa mita za mraba 32,770  kwa gharama ya Sh 2,738,390,000 na  ujenzi uliokwenda sambamba na ujenzi wa choo cha kisasa, Ujenzi wa choo, uwekaji wa taa 34 za nishati ya jua, jengo la askari  wa usalama barabarani, vibanda viwili vya kukusanyia ushuru pamoja na ukuta unaozunguka katika eneo la stendi.

Amesema kuwa baada ya kukamilika, stendi inauwezo wa kuchukua mabasi makubwa 72 yanayoenda mikoani, mabasi madogo 56, pikipiki 59, bajaji 38 na sehemu ya kuendesha magari 52 ya watu binafsi.

“Kabla stendi hii kujengwa halmashauri ilikuwa inakusanya ushuru wa stendi kwa wastani wa Sh lakini tatu hadi laki nne kwa siku, lakini baada ya kufanya kazi makusanyo yameongezeka kutoka hadi kufikia Sh milioni 1.2 hadi Sh milioni 1.4 kwa mwezi.”

Manispaa ya Singida ilipokea Sh 24, 274, 104, 524.70 ikiwa ni moja ya miji 18 iliyopangwa kutekeleza mradi wa uendelezaji na uboreshaji wa mjini  ukilenga kuboresha miundombinu ya barabara, stendi na masoko, mifereji ya maji ya mvua, taa za barabarani.