Kasi ndogo ya ujenzi nyumba ya Mkuu wa Wilaya yamkera Waziri

Imewekwa tar.: April 2nd, 2020

Waziri wa Nchi Ofisi ya Rais Tawala za Mikoa na Serikali za Mitaa Mhe. Selemani Jafo amekerwa na kasi ndogo ya Ujenzi wa nyumba ya Mkuu wa Wilaya ya Dodoma na kuagiza kuongezwa kwa nguvukazi kwa mkandarasi wa SUMA JKT.

Waziri Jafo ametoa kauli hiyo leo alipofanya ziara ya kikazi ya kukagua maendeleo ya ujenzi wa nyumba hiyo inayojengwa na Mkandarasi Suma JKT  na kuwaagiza  kuongeza nguvu ili mKuu wa Wilaya hiyo  aweze kuhamia kwa muda uliopangwa.

“ Nikiangalia Idadi ya mafundi  hapa  ukilinganisha na muda uliopangwa kukamilishwa kwa kazi  naona kabisa haitawezekana , sasa ili iwezekane ni lazima muongeze  nguvukazi  na kubadilisha mpango kazi wenu” amesisitiza Waziri Jafo.

Waziri Jafo amehoji  kwa nini  jengo hilo halijakamilishwa  hadi sasa wakati awali lilitakiwe likamilike ifikapo tarehe 10/3/2020, jambo hili linasababisha hadi kufikia sasa Mkuu wa Wilaya hana makazi maalum ya kuishi hapa Dodoma.

Amemuagiza Mkangarasi Suma JKT kuhakikisha anaongeza nguvukazi katika ujenzi wa Nyumba hiyo na kuhakikisha amekamilisha ujenzi ifikapo tarehe 7/5/2020.

“Nataka Mkuu wa Wilaya ya Dodoma ifikapo tarehe 8 Mei, 2020 aingie  kwenye nyumba  yake, Suma JKT nyie ni taasisi ya Serikali na tumewapa miradi  mbalimbali  hivyo tunaimani kubwa na nyinyi, ninawasihi  mafanye kazi hii kwa umakini  na spidi inayotakiwa.” Amesisitiza Waziri Jafo.

Wakati huohuo, Kaimu Katibu Tawala wa Mkoa wa Dodoma Mhandisi Happiness Mgalula amesema  serikali ilitenga shilingi bilioni 1.15 kwa ajili ya ujunzi wa Nyumba ya Mkuu wa Wilaya ya Dodoma  na Katibu Tawala wa Wilaya ya Chemba lakini kwa kutumia FORCE Account  wameweza kujenga nyumba nyingine ya Katibu Tawala wa Wilaya ya Chamwino.