Kakunda anusa Harufu ya Ufisadi Halmashauri ya Ulanga Morogoro

Imewekwa tar.: August 3rd, 2018

Naibu Waziri Ofisi ya Rais Tawala za Mikoa na Serikali za Mitaa (OR TAMISEMI) Mhe. George Kakunda, ameagiza kufanyika uchunguzi wa kina kwa miradi ya maendeleo baada ya kubaini ubadhilifu wa mamilioni ya shingi katika halmashauri ya Ulanga.

Mhe. Kakunda ametoa agizo hilo alipofanya ziara katika halmashauri hiyo ambapo amemwagiza Katibu Mkuu Ofisi ya Rais TAMISEMI Mhandisi Mussa Iyombe, kuunda timu maalum kufanya uchunguzi kwa miradi ya maendeleo pamoja na fedha za Serikali.

“lazima timu ichunguze hilo greda kama lilinunuliwa jipya au used (lililotumika), na linafanya kazi zake wapi, lina faida gani kwa jamii ya Ulanga, haiwezekani, milioni 400 kama mmedhamilia mngeweza kununua matrekta 40 mapya kabisa kwa shilingi milioni 400”, alihoji Kakunda.

Waziri Kakunda hakufurahishwa na halmashauri ya Ulanga kufanya uamuzi wa kununua greda kwa fedha za wananchi milioni 400 ambalo si kipaumbele cha wananchi na kuagiza wale wote waliohusika wachukuliwe hatua baada ya uchunguzi.

“Mngesema mnavikopesha vikundi kumi kwa mfano mngekuwa mmefika wapi, hata kama kikundi kimmoja kingechukua trekta moja kwa kulikodisha tu, hicho kikundi kingelikuwa kimefika wapi, mnaenda kununua greda, watu wote waliohusika, yeyote yule hata kama amestaafu kule kule alikostaafu lazima afuatwe, mimi namsifu Mbunge kwa kuliibua hili”, alisisitiza Kakunda.

Mwenyekiti wa halmashauri ya Ulanga Furaha Lilongeli, ambaye pia ni Diwani wa Kata ya Mwaya amekiri kutumika kwa shilingi milioni 400 kununua greda lakini walimwomba Mkaguzi wa Hesabu za Serikali (CAG) aifute hoja hiyo kwa kuwa ni ya muda mrefu.

“katika hoja za ukaguzi tuliamua katika baraza la madiwani na Mhe. Mbunge (Mhe. Mlinga) akiwepo na alipokuja CAG (Mkaguzi wa Hesabu za Serikali) tulimwomba, kama ikiwezekana aifute hoja hii kwani ni ya muda mrefu, ilitokea wakati halmashauri ya wilaya ya Ulanga haijagawanywa katika halmashauri mbili za malinyi na Ulanga”

Katika hatua nyingine waziri Kakunda ameagiza kusitishwa kwa mradi wa kutengeneza chaki kwa kuwa sio kipaumbele cha vijana hao ambao wanafanya shughuli za ufugaji nyuki kwa sasa lakini Maafisa Maendeleo ya Jamii wamewapa mradi wa kutengeneza chaki.

“kama mtu anafanya kazi ya kilimo anatakiwa asaidiwe katika shughuli ya kilimo, kama mtu anafanya kazi ya asali unatakiwa umpe kiwanda cha kuchakata asali na nta, hiyo ndiyo kazi yake na anauzoefu wa hiyo kazi, wewe unampelekea chaki halafu kiwanda kikifa useme hawakuwa na uzoefu, kwanini, maamuzi hayo lazima yapinduliwe”, alisema Kakunda.

Naibu Waziri Kakunda ameendelea na ziara yake mkoani Morogoro ambapo amefanya ziara wilayani Ulanga na kutembelea shule ya sekondari Selina Kombani, Mafunzo ya Tusome Pamoja, kituo cha afya Lupiro na kuongea na watumishi wa  halmashauri, pia ametembelea halmashauri ya Mji na wilaya ya Kilombero na kuongea na watumishi na kukagua baadhi ya miradi ya maendeleo.

Anaandika Fred Kibano wa OR TAMISEMI