Kaaya awahimiza Vijana kujiajiri kupitia kilimo

Imewekwa tar.: October 16th, 2019

VIJANA wakiwamo wanafunzi wa sekondari wametakiwa kukitumia kituo cha kilimo, taaluma na mawasiliano kilichopo Mpwapwa Mkoani Dodoma kupata ujuzi wa kilimo cha mbogamboga na maua ili waweze kuondokana na tatizo la ajira.

Wito huo ulitolewa jana na Katibu Mkuu wa Jumuiya ya Tawala za Mitaa Nchini (ALAT),  Elirehema Kaaya alipofanya ziara ya kukagua maendeleo ya miradi inayotekelezwa kupitia Mradi wa kuboresha Mazingira ya Biashara na Uwekezaji (LIC) inayotoekelezwa katika Halmashauri za Mikoa ya Dodoma na Kigoma kwa ushirikiano baina ya Ofisi ya Rais Tawala za Mikoa na Serikali za Mitaa  na Ubalozi wa Dernmark.

Kaaya amesema kuna haja ya wazazi ,walezi na walimu kupeleka Watoto wao katika kituo hicho cha kilimo ili waweze kujifunza na kujikwamua  kiuchumi mara baada ya kumaliza masomo yao  na kuleta maendeleo kwa jamii inayowazunguka.

 “Ni vyema kwa vijana wakiwemo wale waliokuwa sekondari kutumia kituo hiki kujifunza ili wanapomaliza masomo yao wakiwa wanasubiri matokeo basi watumie ujuzi kujishughulisha na kilimo na kama hawataendelea na masomo basi waendelee na hii itapunguza malalamiko ya kukosa ajira. Watanzania wanatakiwa kujua hakuna ajira inayozidi kilimo cha aina hii, hii elimu wanayopata hapa wakaifanye wakati wanasubiri matokeo ya kuendelea na elimu ya juu,”Amesema Kaaya.

Kaaya ameeleza uboreshaji wa kitua hicho umetumia zaidi ya Sh milioni 150 na Halmashauri ya Wilaya ya Mpwawa milioni 90 kwa ajili ya kuandaa kitalu, kutoa mafunzo kwa nguvu kazi ambapo wakulima wamepata elimu hiyo.

Kaaya amesema kumekuwa na mwamko mdogo wa vijana kuchangamkia mafunzo yanayotolewa na kituo hicho na wengine kuona kama kilimo ni utumwa wakati kinaweza kuwakwamua kiuchumi.

Hata hivyo, Kaaya ameagiza kujengwa kwa mfumo wa kuvuna maji ya mvua kwenye majengo ya kituo hicho ili kukabiliana na upungufu wa maji kwenye eneo hilo na kutengeneza uzio wa asili kama michongoma.

“Nimejulishwa kuwapo kwa kutokuwa na maji ya kutosha, uzio na kutokuwa na nguvu kazi wakihitajika vibarua hawapatikani, lakini kunachangamoto zingine tunapaswa tuzibadili kuwa fursa, mfano tunaweza kujenga uzio wa michongoma na pia kuweka mifumo ya kuvuna maji,”Amesema.

Aidha, Kaaya ametoa wito kwa Halmashauri nchini, jamii na taasisi zikiwemo shule, hospitali na ofisi mbalimbali kuweka mifumo ya uvunaji maji ya mvua ambayi yatatumika kutumika kwa shughuli nyingine ikiwemo usafi na umwagiliaji.

Awali, akitoa taarifa ya kituo hicho, Mkuu kituo cha Kilimo, Taaluma na Mawasiliano Kibakwe, Samson German amesema kituo hicho kinatoa huduma za kilimo na mifugo kwa wakulima katika eneo husika.

Aidha, amesema mpaka sasa kituo kimetoa elimu kwa vitendo kwa wanafunzi 30 wa mafunzo ya ujuzi waliotoka chuo cha kilimo na mifugo Visele Mpwapwa, pia wakulima 60 kutoka vijiji vya Kibakwe, Iyenge na Chamtumile juu ya kanuni za kilimo bora cha mbogamboga ili kuboresha lishe na kuongeza kipato.

Na Angela Msimbira OR-TAMISEMI