‘Jiimarisheni zaidi katika Uongozi na Utendaji’ Waziri Mkuu Majaliwa

Imewekwa tar.: December 3rd, 2018

Waziri Mkuu wa Jamhuri ya Muungano wa Tanzania Mhe. Kassim Majaliwa Majaliwa amewataka Viongozi wa Serikali kutumia fursa ya mafunzo wanayoyapata mara kwa mara  kujiimarisha zaidi katika Uongozi na Utendaji kazi wao wa kila siku.

Kauli hiyo ameitoa mapema leo Jijini Dodoma alipokua akifungua mafunzo ya siku Tano kwa Wakuu wa Mikoa na Makatibu Tawala Mikoa Tanzania bara yaliyoandaliwa na Taasisi ya Uongozi.

Alisema kuwa Mhe. Rais na sisi wasaidizi wake tuna imani kubwa na uongozi na utendaji kazi wenu, hatuna shaka yeyote maana mlipekuliwa sana wakati wa mchakato wa kuelekea uteuzi wenu, mkiwa kama wasimamizi wakuu  na watendaji wakuu wa shughuli zote za Serikali katika Mikoa yenu; huu ni wakati mzuri wa kujiimarisha zaidi katika uongozi na utendaji kazi wenu.

“Mada zilizochaguliwa ni muhimu na muafaka katika kuboresha Uongozi na Utendaji kazi  hivyo kila mmoja wenu ajithathmini kupitia mafunzo haya kisha aboreshe zaidi utendaji kazi wake ili tuweze kumhudumia vizuri mtanzania” Alisema Mhe. Majaliwa.

Aliongeza kuwa katika mada inayohusu Majukumu na Mipaka ya kazi  mtajifunza namna ya kufanya kazi bila mikwaruzano isiyo na tija baina yenu na viongozi wa mihimili mingine ya Dola, Viongozi wa Kisiasa na Watendaji wengine Serikalini.

Pia alibainisha kuwa katika mada ya Uongozi, Hisia na Mahusiano Mahala pa kazi kuwa Viongozi hao watafahamishwa  kwa undani mbinu za kuwaongoza watumishi walio chini yao kwa kujenga na kudumisha mshikamano na ushirikiano wa pamoja (Team work).

“Hii itawasaidia zaidi kuona namna mnavyotegemeana na watumishi wa kada na ngazi mbalimbali katika kutimiza majukumu yenu. Ni muhimu sana kufanya kazi kama timu moja ili muweze kuyafikia malengo ya Taasisi kwa upana wake na si malengo ya mtu au kiongozi mmoja” alisema Waziri Mkuu Mhe.Majaliwa.

Kupitia mafunzo mtakayoyapata muyatumie kutafakari na kujithathmini kuhusu hatua za kujiimarisha zaidi kiungozi na kiutendaji. Hatua hizo ni lazima ziwe pamoja na kubadilika kwa mtazamo na kujirekebisha endapo mtabaini maeneo mliyokuwa mkikosea tangu mlipokabidhiwa Ofisi hadi sasa alimalizia Mhe. Majaliwa.

Kwa upande wake, Waziri wa Nchi, Ofisi ya Rais, Tawala za Mikoa na Serikali za Mitaa(TAMISEMI), Mhe. Selemani Jafo alisema pamoja na changamoto bado zipo lakini kwa kiwango kikubwa baada ya mafunzo hayo ambayo yamefanyika kwa viongozi mbalimbali utendaji kazi umebadilika.

Waziri Jafo pia amewapongeza Wakuu hao wa Mikoa pamoja na Makatibu Tawala wa Mikoa kwa Usimamizi mzuri wa miradi ya maendeleo inayoendelea kutekelezwa katika maeneo yao.

“Nimeona katika miradi ya kimkakati inayotekelezwa sasa kama Ujenzi wa Vituo vya Afya ambao unaendelea Nchi Nzima mmefanya kazi nzuri, usimamizi wenu umeleta Tija kwani ujenzi wa vituo vya Afya umetekelezwa kwa ufanisi wa hali ya juu” Alisema Mhe. Jafo.

Akitoa Tathmini ya Ujenzi wa Viwanda ambavyo vimesimamiwa na Wakuu hao wa Mikoa  Mhe. Jafo amesema mpaka sasa Agenda hii imefanikiwa kwa asilimia 49.2 na mpaka sasa viwanda ambavyo vimekwishajengwa kwenye mikoa yetu ni 1280 kati ya 2600 alivyoagiza wakati anazindua kampeni ya Mkoa wangu Kiwanda Changu.

Naye, Mtendaji Mkuu wa Taasisi ya Uongozi Prof.Joseph Semboja alisema mafunzo kwa Wakuu wa Wilaya na Wakurugenzi wa Halmashauri zote Nchini yamekamilika na yamepata mafanikio makubwa.

Pia Prof. Semboja aliwataka viongozi hao kujikita kwenye mafunzo wanayoyapata.

Alitaja malengo ya mafunzo hayo kuwa ni kuimarisha uwezo wa kufanya maamuzi ya kimkakati, kuimarisha uwezo wa kuongoza rasilimali watu na kusimamia nyingine na kujijengea sifa binafsi za uongozi.