Dkt Chaula Atoa Ujumbe kwa wahitimu wa TOA

Imewekwa tar.: December 10th, 2018

Naibu Katibu Mkuu anayeshughulikia Afya kutoka Ofisi ya Rais, Tawala za Mikoa na Serikali za Mitaa (TAMISEMI) Dkt Zainab Chaula amewataka wanachama wa Umoja wa Wahitimu wa Mafunzo wa Osaka-Japan (TOA) ambao ni Makatibu Tawala wa Mikoa pamoja na Wakurugenzi wa Mamlaka ya Serikali za Mitaa kuzingatia kurudisha nidhamu katika utumishi wa Umma.

Dkt Chaula ambaye alimuwakilisha Katibu Mkuu-TAMISEMI, Mhandisi Mussa Iyombe ameyasema hayo leo jijini Dodma wakati wa ufunguzi wa semina ya siku mbili kwa wanachama wa TOA kuhusu maboresho katika  Mamlaka ya Serikali za Mitaa na Tanzania ya viwanda kwa lengo la kutoa huduma bora kwa jamii.

“Nyie mnatakiwa kuwa mfano wa kuigwa katika utendaji wenu wa kazi wa kila siku, inashangaza kusikia mhasibu kaiba, yaani badala watu watumie sehemu zao za kazi kwa kujidai kwa maana ya kutumia taaluma zao vizuri, wanageuka kuwa tatizo” Alisema Dkt Chaula.

Aidha Dkt Chaula amewataka wanachama hao kuzingatia weledi katika utendaji wao wa kazi hususani katika kufanya maamuzi ambayo hayatamuonea mtu ikiwa ni pamoja na kuboresha ukusanyaji wa mapato ya serikali.

Kwa uapnde wake Makamu Mwenyekiti wa TOA ambaye pia ni Mkurugenzi Mtendaji wa Halmashauri ya Wilaya ya Mafia, Erick Mapunda amesema moja ya hoja itakayojadiliwa katika semina hiyo ni kuhusu suala ya vijana.

Amesema kutokana na vijana wengi kulalamika juu ya ukosefu wa ajira, TOA inatarajia kuleta mabadiliko makubwa kwa vijana kupitia kilimo-biashara njia ambayo itawakomboa vijana wengi wengi wenye ajira na wasio.

 “Kila Halmashauri inatenga asilimia kumi ya mapato yake ya ndani kwa ajili ya makundi maalumu ambayo ni wanawake, vijana na walemavu hivyo kwa kuwekeza kwenye kilimo-biashara tunaweza kufanya mapinduzi makubwa kwenye kilimo jambo ambalo litasaidia kuinua uchumi wa nchi pamoja na wa mwananchi mmoja mmoja” Alisema Mapunda.