Bilioni 16 Zatolewa Kuboresha Miundombinu ya Elimu Kwenye Mikoa 17

Imewekwa tar.: August 15th, 2020

Na. Fred Kibano – Monduli na Karatu

Naibu Katibu Mkuu Ofisi ya Rais TAMISEMI anayeshughulikia Elimu Gerald Mweli, amesema jumla shilingi Bilioni 16 zimetolewa kwa ajili ya ujenzi wa miundombinu ya vyoo kwenye mikoa 17 nchini.

Mweli ameyasema hayo jana kwa nyakati tofauti wakati akiongea na walimu na baadhi ya Viongozi wilayani Monduli na Karatu kuwa kiasi hicho cha fedha kimtengwa kukabiliana na upungufu wa matundu ya vyoo kwenye shule 600 za msingi zilizopo katika mikoa 17 na kwamba mikoa mingine yenye shule 900 pia itaendelea kupokea fedha kwa awamu zinazofuta.

“bilioni 16 zimetolewa kwa shule za msingi kati ya 1500 zinazokusudiwa ili kuboresha miundombinu ya vyoo, bilioni 20 zimelipwa kwa walimu kama malimbikizo ya mishahara na Serikali itaendelea kulipa madai ya walimu baada ya uhakiki wa mwisho kufanyika”

Akiwa wilayani Karatu ameridhishwa na kasi ya walimu wa shule ya sekondari Karatu walivyojipanga katika kuinua taaluma na ufaulu wa wanafunzi na kusema wanafunzi wote wenye utovu wa nidhamu hawakubaliki mashuleni, hii inafuatia kwa jumla ya wanafunzi 21 wa kidato cha sita kufutwa shule kutokana na utovu wa nidhamu kwa kuanzisha migomo isiyo na tija shuleni hapo hali iliyopelekea kufutwa shule siku moja kabla ya mtihani wa mwisho wa kidato cha sita 2020.

Kwa upande wake Mkurugenzi Msaidizi wa Elimu Msingi Ofisi ya Rais TAMISEMI Suzan Nussu amewaasa wanafunzi wa sekondari ya Karatu bweni wavulana kusoma kwa bidii na maarifa ili kutoa mchango wao kwa Taifa la kesho kwani matarajio ya nchi ni kuona wanajiunga na vyuo mbalimbali vya Elimu na fani nyingine.

Katibu Tawala wa Wilaya ya Monduli Bwana Robert Amos ametoa ombi kwa Serikali la kuanzisha maktaba za kisasa ambazo zitakuwa na vitabu vya kawaida na vya nakala laini (soft books) na kuwa na maktaba mtandao katika wilaya zote nchini ili kuwainua wasomi walio kwenye Mamlaka za Serikali za Mitaa na Watanzania kwa ujumla wanaosomea masomo na fani mbalimbali ili kuliinua Taifa.

Naye mwalimu Mkuu wa shule ya msingi Manyara bweni wilayani Monduli Bwana Epimark Emmay amesema jumla ya shilingi Bilioni 3.3 zimetolewa na Wadau wa African Wildlife Foundation (AWF) kufadhili ujenzi wa miundombinu mipya ya elimu shuleni hapo ikiwa ni pamoja na madarasa, matundu ya vyoo, nyumba za walimu, bwalo, mabweni, jiko pamoja na samani za shule na kwamba changamoto iliyobakia ni kutokuwa na usafiri wa uhakika ambao hata hivyo Naibu Katibu Mkuu (ELIMU) Ofisi ya Rais TAMISEMI Bwana Gerald Mweli aliahidi kulishughulikia.

Miradi aliyotembelea Naibu Katibu Mkuu Ofisi ya Rais TAMISEMI anayeshughulikia Elimu Gerald Mweli ni pamoja na shule za sekondari na shule za msingi.